ഗുരുവായൂര് ക്ഷേത്രനടയില് നാളെ മുതല് വണ്വേ...
ഗുരുവായൂര്: ക്ഷേത്ര നഗരിയിലെ ഏറ്റവും തിരക്കേറിയ മഞ്ജുളാല് മുതല് കിഴക്കേ നട സത്രം ഗേറ്റ് വരെയുള്ള റോഡില് വെള്ളിയാഴ്ച മുതല് വണ്വേ സംവിധാനം നടപ്പാക്കുന്നു. ശബരിമല - ഏകാദശി സീസണിന്റെ ഭാഗമായി കിഴക്കേ നടയില് രാപകല് വ്യത്യാസമില്ലാതെ തിരക്ക് അനുഭവപ്പെടുന്ന സാഹചര്യത്തിലാണ് ഇത്.
വണ്വേ പ്രകരം മഞ്ജുളാല് ഭാഗത്തുനിന്ന് ക്ഷേത്ര നടയിലേക്ക് ഒരേ ദിശയിലേക്ക് മാത്രം വാഹനങ്ങള് കടത്തിവിടുമ്പോള് കാലങ്ങളായുള്ള ഗതാഗതപ്രശ്നത്തിനാണ് പരിഹാരമാകുന്നത്. ഈ റോഡില്നിന്ന് വടക്ക് - തെക്ക് ഔട്ടര് റിങ് റോഡുകളിലേക്കും പടിഞ്ഞാറെ നടയിലേക്കും അനുബന്ധ റോഡുകളുണ്ട്. അതുകൊണ്ട് ഭക്തര്ക്ക് വണ്വേ ബുദ്ധിമുട്ടുണ്ടാക്കില്ല. കിഴക്കേ നടയില്നിന്ന് നടന്നു വരുന്ന തീര്ത്ഥാടകര്ക്ക് വാഹനങ്ങളുടെ തിരക്കില്പ്പെടാതെ ക്ഷേത്രദര്ശനത്തിനെത്താനാകും.
ഈ റോഡിന്റെ ഇരുവശത്തും നടപ്പാത നിര്മ്മിച്ച് കൈവരികള് പിടിപ്പിച്ച് കാല്നടയാത്ര സുരക്ഷിതമാക്കണമെന്നുള്ള നിര്ദ്ദേശമുയര്ന്നു. ഗുരുവായൂര് നഗരസഭാ ലൈബ്രറി ഹാളില് നടന്ന ട്രാഫിക് റെഗുലേറ്ററി യോഗത്തില് ആക്ടിങ് ചെയര്മാന് മഹിമ രാജേഷ് അധ്യക്ഷയായി. എസിപി ആര്. ജയചന്ദ്രന്പിള്ള, സിഐ എം.യു. ബാലകൃഷ്ണന്, മോട്ടോര് വെഹിക്കിള് ഇന്സ്പെക്ടര് സുരേഷ്, നഗരസഭാ പ്രതിപക്ഷ നേതാവ് കെ.പി.എ. റഷീദ്, വികസന സ്റ്റാന്ഡിങ് കമ്മിറ്റി ചെയര്മാന് കെ.എ. ജേക്കബ്, മര്ച്ചന്റ്സ് അസോസിയേഷന് പ്രതിനിധി വി. മനോജ് മേനോന്, ഓട്ടോ - ടാക്സി യൂണിയന് പ്രതിനിധികള് തുടങ്ങിയവര് സംബന്ധിച്ചു.
No comments:
Post a Comment