അരവണ വിതരണത്തില്‍ വീണ്ടും നിയന്ത്രണം; ഒരാള്‍ക്ക് 10 ടിന്‍ മാത്രം...
ശബരിമല: ശബരിമലയില്‍ അരവണവിതരണത്തില്‍ വീണ്ടും നിയന്ത്രണം. ഒരാള്‍ക്ക് ശരാശരി പത്ത് ടിന്‍ അരവണ വീതമാണ് ബുധനാഴ്ച മുതല്‍ വിതരണം ചെയ്യുന്നത്. കഴിഞ്ഞ പതിനഞ്ചു ദിവസത്തിനുള്ളില്‍ ഇത് മൂന്നാം തവണയാണ് അരവണയുടെ വിതരണത്തില്‍ നിയന്ത്രണം കൊണ്ടുവരുന്നത്.
അന്യസംസ്ഥാനങ്ങളില്‍ നിന്നുവരുന്ന അയ്യപ്പഭക്തരെയാണ് ഇത് കൂടുതല്‍ ബുദ്ധിമുട്ടിലാക്കുന്നത്. ശരാശരി 30 മുതല്‍ 100 ടിന്‍ വരെയായിരുന്നു ഇവര്‍ വാങ്ങിയിരുന്നത്. വില്‍പ്പനക്കനുസരിച്ച് ഉത്പാദനം നടക്കാത്തതും, കരുതല്‍ ശേഖരത്തില്‍ വന്ന ഇടിവുമാണ് അരവണ വിതരണത്തില്‍ ബോര്‍ഡ് കടുത്ത നിയന്ത്രണം ഏര്‍പ്പെടുത്തിയതിന് പ്രധാന കാരണം. ആദ്യം ഒരാള്‍ക്ക് 50 ടിന്‍ അരവണ ലഭിച്ചിരുന്നെങ്കില്‍ പിന്നീട് അത് 30 ആയും ഇപ്പോള്‍ 10 എണ്ണമായും കുറച്ചു.
അരവണയില്‍ ജലത്തിന്റെ അംശം കുറയ്ക്കാന്‍ പൂര്‍ണമായും തണുപ്പിച്ചാണ് ഡപ്പകളില്‍ നിറയ്ക്കുന്നത്. ഇതിന് ഏറെ സമയം ആവശ്യമാണ്. ഭക്ഷ്യസുരക്ഷാ കമ്മീഷണറുടെ നിര്‍ദേശങ്ങള്‍ കര്‍ശനമായി പാലിക്കണമെന്ന് ഹൈക്കോടതി നിര്‍ദേശവും വന്നിരുന്നു.ഇതേത്തുടര്‍ന്ന് പ്രതിദിനം 2.50 ലക്ഷത്തോളം ടിന്‍ അരവണ ആവശ്യം വേണ്ടിടത്ത് ഉത്പാദിപ്പിക്കുന്നത് 2 ലക്ഷം ടിന്നില്‍ താഴെ മാത്രമാണ്.
മണ്ഡലകാലത്തിന്റെ തുടക്കത്തില്‍ 25 ലക്ഷം ടിന്‍ കരുതല്‍ ശേഖരം ഉണ്ടായിരുന്നെങ്കില്‍ നിലവില്‍ 3 ലക്ഷം ടിന്‍ മാത്രമാണ് ഉള്ളത്. കഴിഞ്ഞ വര്‍ഷത്തേക്കാള്‍ 50000 ടിന്‍ അധികം അരവണയാണ് പ്രതിദിനം ഇക്കുറി വിതരണം ചെയ്യുന്നത്. അരവണ നിര്‍മ്മിക്കുന്നതിനുള്ള അസംസ്‌കൃത വസ്തുക്കള്‍ ലഭിക്കാതിരുന്നത് നേരത്തെ പ്രശ്‌നങ്ങള്‍ സൃഷ്ടിച്ചിരുന്നു. അരവണ വില്‍പ്പനയില്‍നിന്ന് മാത്രം ബോര്‍ഡിന് ഇതുവരെ ലഭിച്ചത് 43 കോടി രൂപയാണ്.
No comments:
Post a Comment